أرخص دمّ ...!!!

أرخص دمّ ..!!!

قرّب قرّب قرّب قرّب اشتري بالكوم أرخص دم قرّب قرّب قرّب قرّب عبّي جراكن البيت كله بأرخص دم قرّب قرّب قرّب قرّب اشرب للصبح من أرخص دم قرّب قرّب قرّب قرّب.. اشتري وإشرب وعبّي ... قبل ما يخلص دم المصري .. أرخص دم ... دم المصري .... أرخص دم

أسرانا في سبعة وستين اندبحوا ورمل الصحرا شرب لمّا شبع من أطهر دم ... واتغير لون الرملة الصفرا للون الأحمر ... لون الدم ... فرّطنا في دم ولادنا في مناقصة فاز بيها اللي دفع أوطى سعر .... ههههههههه .... بصراحة .. احنا بعناه أصلاً من غير سعر

عبّارة الموت كانت مليانة بأغلى دم .. مليانة دم يملى البحر والدم اتفرّغ في المية واتحول لون المية للون الأحمر ... لون الدم واتباع الدم بأبخس سعر

قصر ثقافة بني سويف كان مليان بأغلى دم.. مليان دم يعبّي القصر .. وانسال الدم على جدران القصر .. ورسم لوحة مافيهاش ولا لون مافيهاش ولا لون غير لون واحد ... اللون الأحمر .. لون الدم واتباع الدم بأرخص سعر

قطر الصعيد كان مليان بأغلى دم.. مليان دم يغطي كل شبر فيكي يا مصر .. والقضبان بعد ما كان لونها اسود متفحم ... اتحول لونها للون الأحمر .. لون الدم واتباع الدم بأرخص سعر

آخر جركن دم اتباع في ألمانيا ... من غير واحد سنت أو حتى عُشر القرش جركن كامل مليان بالدم الغالي اتباع في ثواني بأبخس سعر في المحكمة وقدّام القاضي .. دم المصرية "مروة الشربيني" ساح ع الأرض وراح ع الفاضي ... ولا حد اتكلم ولا قال بم الريس طبعا مش فاضي ... ووزير الخارجية سهران كالعادة في النادي .. وشيخ الأزهر كان نايم ولمّا صحي قال اللي حصل ده شيء مش عادي .. لأ يا شيخ ... تصريح فعلاً جامد ... جامد .. بس انت معذور .. فعلاً معذور .. مشغول في كتابة برقية لبيريز تصبّره على أسر الجندي النوغّة ... شاليط

مش قلتلكوا من الأول .. دم المصري أرخص دم ... ياعالم يا هوووووووووووووووووووووه .. مين يشتري .. أرخص دم أمّا انت صحيح راجل غريب ليه ...!!!؟؟؟ لمّا هو دم رخيص للدرجادي .. مانصبر شوية نصبر شوية ..بكره يتباع من غير فلوس وبلاها غرامة ع الفاضي عندك حق .. ليه ندفع فلوس في دم بعد شوية هايكون مجاني

وبعد شوية أيام وليالي نزل في تلفزيونات العالم المتقدم والمتخلف والنامي ...الإعلان التالي ... يا عالم يا هوووووووووووه .. اللي عاوز دم مجاني .. يدبح مصري ويعبّي ويشرب وهوا مطمّن ... أيوة ما تستغربوش ... يعبي ويشرب وهوا مطمن ... دا المصري دمه مجاني مش بس كده ... دا الدم المصري عملنا عليه عروض وهدايا وجوايز .. كل ما تقتل واحد مصري وتشرب دمه تاخد دم واحد مصري إضافي... .. غير كمان الهدية مجانية اللي عبارة عن قطعة لحم مصري من اللي هية ... قطعة لحم مصري من اللي هية ... زي ما تختار .. متحمرة أو مشوية إلحق بسرعة الفرصة الذهبية ... واتصل على زيرو توسعمية العرض مستمر حتى نفاد الكمية .... العرض مستمر حتى نفاد الدم المصري ..........