تعليقات :

- اتخاذ اللجنة المسماه بلجنة الأحزاب لقرار عدم الموافقة على إنشاء حزب الوسط هو قرار قليل الأدب من لجنة قليلة الأدب تخضع لنظام سياسي متخلف الوقاحة هي شعاره الحقيقي ... كنت عاوز أكتب كثير عن الموضوع ده بس آثرت أن ادخر الكلام إلى ما بعد صدور قرار المحكمة ...

==================================

- مؤتمر الحزب اللاوطني لا يوجد به أي شيء جديد تهريج في تهريج زي مؤتمر كل سنة أهم حاجة فيه الهيصة اللي بيغرق فيها نواب الوطني اليومين بتوع المؤتمر .. إقامة في فندق خمس نجوم وأكل وشرب على كيف كيفك وشوية تصقيف على حاجات مش فاهمين عنها حاجة وخلاص وانفض المولد بعد أن امتلأت الكروش بشتى أنواع لحوم البوفيهات المفتوحة والحلويات المختلفة الأنواع وعلى كل لون يا باطيستا ... الحاجة المسخرة الشعار بتاع المؤتمر السنة دي ... شعار إنما إيه ... تقريبا اللي ألفه مؤلف هو نفس مؤلف أغنية المغني اللي اسمه مصطفى قمر ... له أغنية اسمها من فضلك .. لو سمحت .. نزل إيدك تحت .. الشعار جه على نفس المنوال ... من أجلك انت .. الحزب فوق والشعب تحت ....!! من أجل مين يا شلة نصابين ... منكم لله ضيعتوا البلد والشعب والناس يا ولداه بقت تمشي تكلم نفسها .. حسبنا الله ونعم الوكيل ... تقدروا تقولوا ليا المؤتمر المسخرة ده كلف كام .... مش الملايين اللي اتصرفت على التهريج ده كان أولى بها الشعب الذي يرزخ تحت خط الفقر ... أيها الشعب إن الحزب اللا وطني يخاطبك .. من أجلك أنت ... التوريث جاي من تحت لتحت .... فبماذا ستجيبه ...

==================================

- إن الملاحظ للدوري التركي في الفترة الأخيرة حري به أن يتحسر على الدور المصري إن جاز لنا أن نطلق على الوضع المصري الحالي كلمة دور أصلاً .... فتركيا تراها قد نشطت على جميع الأصعدة عالمياً وإسلامياً بل وحتى عربياً .. حتى علاقتها مع إسرائيل لم تمنعها من اتخاذ مواقف جريئة وقوية في مواجهة ما تقوم به من اعتداءات وتجاوزات ... أما الدوري المصري "مصر مبارك" كما يقولون فلم يعد دوراً يعاني من التقزم فحسب .. بل إن مصر مبارك وبكل فخر واعتزاز أصبح لا دور لها .. أصبحت كالماء لا طعم لا لون .. لا رائحة ... إن الدور المصري اقتصر على عقد اللقاءات الترفيهية في شرم الشيخ التي يضحك علينا إعلامنا الرسمي ويقول عنها مؤتمرات قمة وهي لا تعدو كونها نوعاً من أنواع السياحة السياسية ....!! وهو نوع جديد من السياحة أصبحت مصر تقوم به لما أفلست على يد النظام الحاكم الحالي ... نوع كده من السياحة يشبه السياحة العلاجية والسياحة الدينية والسياحة الخزعبلاتية .... وسلم ليا على شرم الشيخ ...!!! .... إن الناظر إلى رجب طيب أردوغان ليدرك أنه هكذا يكون رجل الدولة الساعي دائماً إلى مصلحة بلده بكل كرامة وإباء وعزة نفس ... تعلموا يا حكام العرب .... تعلّم يا رئيس مصر الحالي والقادم ... تعلم كيف يكون رجل الدولة .....!!!

==================================

- الأخ محمود عباس أعلن عن رغبته في عدم الترشح الانتخابات الرئاسية القادمة .............. هههههههههههههههههههههه نكتة الموسم .. قديمة المسرحيات دي يا أبو مازن .. دي كانت مسرحيات الناس بتعملها زمان من أيام خطاب التنحي بتاع الرئيس السابق جمال عبد الناصر ... فاكره طبعا ايوه ما أنت اقتبست المسرحية بتاعتك دي من المسرحية بتاعته .. تعلن عن رغبتك في عدم الترشح وبعدين تخرج مظاهرات حركة فتح .. وتلف شوارع الضفة .. اخترناك اخترناك وعشان كده احنا بايعناك .. يا أبو مازن إلعب غيرها ... لعبتك بايخة وقديمة ... فكر في لعبة جديدة أي رأيك في فيفا 2009 .. جرّب تلعبها هاتلاقيها لعبة مسلية أكثر من لعبتك القديمة دي ... أو شوفلك مسرحية جديدة مثّل فيها انت و محمد دحلان والشلة بتاعته ... إيه رأيك في مسرحية شاهد ما شافشي حاجة ... مسرحية حلوة ... ولايقة عليك .. ... بس ياريت تلاحظوا معايا الكلمات التي تم اختيارها للقرار المسرحي لعباس .. فالخبر جاء كالتالي : عباس يعلن عدم رغبته في الترشح لانتخابات الرئاسة الفلسطينية القادمة... ولم يصاغ الخبر كالتالي مثلاً عباس يعلن عدم ترشحه لانتخابات الرئاسة الفلسطينية القادمة ... وشتان بين المعنيين .. فعدم الرغبة معناه إنه لو تراجع عن رغبته فسيكون بناءاً على ما يطلبه المشاهدون ... أما عدم الترشح فلو رجع فيه فهايكون رجع في كلامه .. ومن المعروف عند العرب إن اللي يرجع في كلامه بيبقى مشكوك في رجولته .... خالص تحياتي ونلتقي في مسرحية أخرى .. .

==================================

- عجيب أمر منظمة المؤتمر الإسلامي ... فقراراتها مثيرة للضحك من هنا للسنة الجاية .. في اجتماعها الأخير في جدة لمناقشة الاعتداءات الإسرائيلية على المسجد الأقصى قالت أن المسجد الأقصى خط أحمر ...يا جامد ... سلم ليا على الخطوط الحمرا اللي اتكلمنا عليها من أيام قرار التقسيم عام 1947 والحال وصل بينا واحنا في أواخر 2009 إلى الحضيض وكله بفضل كلمة الخطوط الحمرا دي ... كام خط أحمر اتكلم عنها رؤساء وملوك وأمراء وزعماء العالم العربي والإسلامي ....!!! أتحدى أي واحد يقدر يعدهم ... دي خطوط مالهاش أول من آخر ... وسبحان الله الخط ده بيكون النهارده أحمر وما هي إلا أيام ونلاقي الخط الأحمر تم دهسه بالنعال من قبل إسرائيل فنقوم إيه عشان ما نبقاش مكسوفين قدام نفسنا نحول اللون بتاع الخط من اللون الأحمر للون الأخضر ونعمل لنا خط تاني لونه أحمر إلى أن يتم دهسه فنحوله للون الأخضر ونعمل خط أحمر تاني .. وهكذا دواليك ... دواليك .. دواليك ... وكمان المنظمة قالت إيه إن التطورات الحالية يمكن أن تؤدي إلى تفشي العنف وصدور ردود أفعال غير محسوبة ... يا سلام على رأي أحمد زكي في مسرحية العيال كبرت ... يا سلام ... خايفين على إسرائيل وشعبها الحنون من أعمال العنف وردود الأفعال غير المحسوبة ... داتكو وكسة .... ما لاقيتشي مصطلح أعلق بيه على تلك المنظمة وتصريحاتها الخايبة التي تصدر منها كل أزمة غير المصطلح ده اللي لاقيته أنسب مصطلح للتعبير عن غضبي من هذه المنظمة البالغة الضعف ... دا يا راجل أضعف من جامعة الدول العربية ....!!! الظاهر إن الصراع سيكون محتدماً في العشر سنوات القادمة على من سيفوز بلقب المنظمة الأكثر ضعفاً .. منظمة المؤتمر الإسلامي أم جامعة الدول العربية ... إذا كنت من هواة التوقعات فاتصل بـ 0900090009 وسجل توقعك يمكن تفوز معانا بخط أحمر من الصفيح الخالص ... ملحوظة سعر الدقيقة 100 فلس عربي أصيل .

==================================

- الكابتن أحمد شوبير بصيت لاقيته عامل برنامج اسمه الوجه الآخر بيستضيف فيه الفنانين والفنانات والمشاهير والمشهورات من باب كده التنويع والشيء لزوم الشيء وكمان من باب عاوز يثبت فيه إنه إعلامي كبير ويخرب بيت كلمة إعلامي دي اللي هوا وغيره كثير صدعونا بيها .. محسسيني إنهم يعني خلاص لما عملوا برنامج واللا اثنين خلاص بقوا من كبار الإعلاميين .. يا كابتن أحمد صاحب بالين كذاب وصاحب ثلاثة منافق .. يا كابتن أحمد ده مش لايق عليك ولا أنت مناسب لموضوع أنك تستضيف فنانة وتسألها عن دورها في فيلمها الأخير الجريئة والذئب ولماذا لجئت فيه إلى الإغراء الصريح وتعرية أجزاء كبيرة من جسدها المثير .......!!! ركّز في مجال الرياضة وذاكر كويس واحترف موضوع البرامج الرياضية أحسن ما تقعد تتنقل في كل مجال شوية وفي الآخر هاتعمل زي اللي رقصوا على السلم ويمكن كمان لا تطول بلح الشام ولا عنب اليمن ... يا أخي دا حتى البرنامج الرياضي بتاعك بتدخل فيه حاجات غريبة لا تمت للرياضة بصلة ... وبتوصل الأمور لدرجات ما لهاش لازمة ومواقف وموضوعات كثير بتكبرها أكبر من اللازم وبتبالغ في معالجتها .. الاعلام اللي انتوا بتقولوا عليه مش صراخ وعويل ولطم خدود ... نصيحة ركّز واقعد مع نفسك وراجع طريقك وهدفك قبل ما يجرفك التيار وتندم وتقول ياريت اللي جرى ما كان .

==================================

- الحرب الغبية المستعرة حول مباراة مصر والجزائر أثبتت لي فعلاً أننا نعيش حالة من الفراغ من كل شيء إلا الأشياء الهايفة ... كل واحد بيذيع برنامج خلاص صدّق نفسه وكل شوية يقول أنا إعلامي .. أنا إعلامي ... عمل زي اللي كان بيقول أنا مش قصير قزعة أنا طويل وأهبل .. هوا بيقول أنا مش مواطن عادي أنا إعلامي غير عادي .... وحوّل البرنامج بتاعه إلى بوق عمّال ينفخ فيه بأي كلام وخلاص .. كانوا زمان بيقولوا اللي ما يعرفشي يقول عدس .. دلوقتي اللي مش عارف أي حاجة في أي حاجة يعمل له برنامج ويدش فيه أي كلام وخلاص .... كذلك الحال ينطبق على عدد لا بأس به من الصحفيين خصوصاً الصحفيين الرياضيين .. على فكرة الكلام ده ينطبق على الجانبين المصري والجزائري وإن كنت متابعاً للجانب المصري أكثر ... واللي زاد وغطى كل مذيع أو مقدم برامج متضايق من مقدم برامج تاني يقوم يشتم فيه ويبهدله بطريقة غير مباشرة وبطريقة مباشرة كمان وكل ده تحت مسمى الدفاع عن كرامة مصر ... ههههههههههههه .. كرامة مصر ... كنتوا فين يا بتوع كرامة مصر لم إسرائيل بتقتل على الحدود كل أسبوع عسكري واللا اثنين .. كنتوا فين يا بتوع كرامة مصر لما مروة الشربيني اتقتلت في المحكمة بألمانيا وزوجها الضابط الألماني ضرب عليه النار من مسدسه والحكومة بتاعتنا ما فتحتشي بقها والحكومة الألمانية ما عبرتناش بربع كلمة اعتذار .. كنتوا فين يا بتوع كرامة مصر لم أسرانا في 67 اتقتلوا بدم بارد والموضوع اتقفل من وقتها إلى يومنا هذا ... كنتوا فين يا بتوع كرامة مصر لما الناس ماتت في طوابير الخبز وفي القطارات المحترقة وقصور الثقافة المولعة والعبارة الغرقانة ؟؟؟؟ كنتوا فين تقدروا تقول ليا كنتوا فين .. كنتوا ساكتين لأن دي سياسة .. طرفها الظالم اللي داس على كرامة مصر إما إسرائيل أو دولة غربية أو النظام الحاكم في مصر .. أما لما يقوم صحفي في الجزائر بتغيير صورة لاعبي فريق الكرة المصري بصور ممثلات وراقصات فتنقلب الدنيا وما تقعدشي .. مش هما دول الرقاصات والممثلات اللي بتتباهوا بيهم وبتقولوا عليهم دول رواد الحركة الفنية في مصر وبتعملوا لهم المهرجانات والمؤتمرات .. انكسفتوا ليه لما حطوا صورهم بدل صور لاعبي المنتخب ... وبعدين لو صحفي عمل كده .. اعملوا انتوا كده جيبوا صورة منتخب الجزائر وشيلوا الصور بتاعة اللاعيبة وحطوا صور الممثلات اللي عندهم وهن كثر .. هوا فيه دولة عربية دلوقتي ما عندهاش من الممثلات والراقصات ما تنأى الكتب عن إحصائهن ...!!! صحيفة عملت كده صحيفة تانية ترد .. صحفي كتب مقال .. صحفي تاني يرد .. إنما الدنيا تقوم وما تقعدشي ونصرخ ونولول ونلطم الخدود ونغني ونقول كرامة مصر انداست .... مع إن ما فيش مسئول جزائري صرح تصريح مش كويس لا عن مصر ولا عن شعب مصر .. والمذيع بتاعنا عمال يغني كل دقيقة كرامة مصر كرامة مصر وفاضل له شوية صغيرة بس ويعيط على كرامة مصر وواحد تاني يعمل مبادرات ويروح للصحيفة اللي فيها الصحفيين اللي نشروا الصورة ... فكرني بالمدعو عمرو خالد لما عمل وفد وراح الدنمارك لما الصحف الدنماركية نشرت الصور المسيئة .... هو ده وقته يعني ما كنت تروح الدنمارك الأول انت مستني لما صحف الدنمارك تنشر الصور عشان تروح .... إيه الهبل ده ... احنا بنعاند بعض ليه ... العملية كلها لعب عيال وكورة في كورة ليس الا الظاهر إن احنا اللي على راسنا بطحة وعلى طول بنحسس عليها ... واحد غلط يا جماعة نرد الغلط في نفس الاتجاه وبنفس القوة أو اشد أما ان احنا نحول الاتجاه الى ناحية تانية خالص ونتحول من الكلام في ماتش كورة والتجاوزات الصحفية والإعلامية حول تناول هذا الماتش نتحول للكلام على إن ده مساس بكرامة مصر فده اسمه عبط ... لأن لو كرامة مصر توقفت على مباراة في كرة القدم فتبقى وكسة ... حتى لو مشينا معاكم على نفس المنوال وصدقنا إن كرامة مصر متوقفة على مباراة في كرة القدم فعشان نحافظ على كرامة مصر يبقى لازم تفوز بالمباراة .. ورونا بقى يا بتوع الكرامة غيرتكم على مصر وكرامتها وفوزوا بالمباراة واللا احنا شاطرين بس في ا لكلام إنما الفعل فيا عيني عليه ... أنا على يقين إننا لو خسرنا المباراة هايطلع واحد يقول لك مش مهم إن احنا خسرنا المباراة المهم إن احنا حافظنا على كرامة مصر .... بالذمة ده كلام !!!

==================================

- الجماعة اللي اسمها الحوثيين مش كفيها اللي بتعمله في اليمن والجيش اليمني وقررت الدخول إلى الحدود السعودية .. إيه يا جماعة .. هوا فيه إيه ... أعتقد إن فيه حاجتين اثنين .. الحاجة الأولى إن الجماعة دي واقف وراها دول تقيلة بتدعمها بالفلوس والسلاح ودي حاجة بديهية .. الحاجة الثانية بقى إن أي رئيس عربي لما ييجي يتكلم عن الحروب وإننا لازم نحارب إسرائيل ونرميها في البحر ونلعب الكورة في تل أبيب يبقى يتكلم وهوا واقف على أرض صلبة .. مش واقف ورجليه بترتعش في أرض مليانة طين ووحل ... جمال عبد الناصر كان كده .... وعلي عبد الله صالح برده كده ... عبد الناصر وعارفين قصة 67 أما علي عبد الله صالح فكل ما إسرائيل تعمل حاجة يقول افتحوا الحدوووووووووووود افتحوا الحدووووووووووود .. فاتحوووووووووووووووا الحدووووووووووووووووووود .. استمر في غناء هذا المقطع إلى أن قال له الرئيس المصري حسني مبارك .. تعالى لو عاوز تحارب خد لك حته في سيناء وادخل لإسرائيل وحاربها ... وجه وقت الحرب .. ويا ولداه علي عبد الله صالح غارق لشوشته .. مش في حربه مع إسرائيل .. ياريت كنا قلنا له عذره دا بيحارب جماعة منشقة .. دا الجماعة المنشقة دي لو كانت في مصر كان الأمن المركزي مش الجيش المصري .. كان الأمن المركزي قضى عليها في 24 ساعة .... وسلم ليا على الجيوش العربية .. وتحيا الأمة العربية .. تحيا الأمة العربية ...