إضراب 4 مايو .. لازم تشارك
إضراب 4 مايو .. لازم كلنا نشارك فيه .. عارف ليه ...!!؟؟؟؟؟؟؟؟؟؟؟؟؟؟؟
عشان مطالبنا تتحقق ..!!
عشان الحكومة تحس إن الشعب ده خلاص ودع كلمة نعم وحاضر عمال على بطال وبقى يقول لأ ..!!
عشان إسراء عبد الفتاح اللي أمن الدولة خطفها على الرغم من صدور قرار النائب العام بالإفراج عنها ..!!
عشان كل المعتقلين اللي اتقبض عليهم لمجرد إنهم شاركوا في إضراب 6 أبريل السلمي ..!!
عشان مرتبك المنخفض إذا كنت شغال أصلاً ولك مرتب ..!!
عشان الأسعار اللي ولعت ومازالت بتولع كل يوم ..!!
عشان تعيش عيشة كريمة محترمة زي باقي الناس في العالم كله ..!!
عشان الحكومة تحترم آدميتك وما تهينكشي انت وزوجتك وأبنائك في طوابير العيش وفي زحام المواصلات العامة ..!!
عشان الحكومة ما تستخفش بينا وتقول لنا بيانات وأرقام مضللة عبارة عن كذب في كذب عن ارتفاع مستوى معيشتنا وارتفاع معدلات التنمية وانخفاض معدلات التخضم ...!!
عشان تحس إنك لك دور في البلد دي ..!!
عشان تحس إنك إيجابي ...!!
عاوزين نبلغ رسالة للنظام الحاكم وللحكومة المصرية إننا خلاص بطلنا نمشي جنب الحيط ...
إننا خلاص بطلنا ننضرب على خدنا اليمين ونديلكم خدنا الشمال عشان تضربونا عليه هوا كمان ...
احنا عاوزين إيه ...!!؟؟؟
مطالبنا بسيطة خالص .. ولو فيه حكومة محترمة هاتحققها بكل سهولة .. زي ما أي حكومة في أي دولة في العالم المحترم بتعمل ...
عاوزين مرتبات تعيشنا عيشة كريمة
عاوزين مواصلات تحترم آدميتنا
عاوزين أسعار تتناسب مع دخولنا
عاوزين عيش من غير ما تنداس كرامتنا في طوابير
عاوزين نحس إن دي بلدنا
عاوزين ديمقراطية
مش عاوزين بتوع الداخلية يتحكموا فينا زي ما هما عاوزين
مش عاوزين حكومة تضحك علينا ببيانات مضروبة
مش عاوزين توريث للحكم
مش عاوزين ديكتاتورية
عارف ... كل اللي احنا عاوزينه ده .. انت أكيد كمان عايزه .. بس على فكرة الحاجات دي مش ها تتحقق واحنا قاعدين مكنا كده محلك سر .. لازم نتحرك كلنا .. أنا وانت وجاري و جارك وصاحبي وصاحبك وزميلي و زميلك وصديقي وصديقك .. كلنا كلنا لازم نتحرك
كلنا لازم نبقى إيجابيين
عشان كده ..
وعشان تثبت لنفسك إنك إيجابي
وعشان تثبت لنفسك إنك شاركت بحاجة ملموسة في المناداة بتحقيق مطالبك العادلة
وعشان ترضي ضميرك
وعشان لما يجي يوم القيامة وربنا سبحانه وتعالى يسألك عملت إيه لرفع الظلم اللي واقع عليك وعلى إخوانك ...
وعشان تبقى عملت اللي عليك ... حتى لو كان أضعف الإيمان
عشان ده كله
لازم تشارك في إضراب 4 مايو ..
طب إزاي أشارك ..!!!!؟؟؟
بسيطة جداً
ما تروحشي الشغل .. خليك في البيت .. فيه أبسط من كده ..
لا بنقول لك شارك في مظاهرة ولا اهتف في ميدان عام ولا أخرج للشارع شايل يافطة ...
كل اللي بنطلبه منك .. إنك تعمل زينا وما تروحشي الشغل .. احنا كمان هانعمل كده ومش أكثر من كده ...
غيب من الشغل زينا واقعد في البيت اليوم ده .. أقعد مع أولادك مع زوجتك مع والدك مع والدتك مع أخواتك مع قرايبك مع أصدقائك مع زمايلك حتى مع نفسك .. اتفرج على التلفزيون اسمع الراديو .. أدخل على النت .... اقعد في البيت وما تروحشي في أي حته اليوم ده .. يوم واحد بس ... تفتكر ده مطلب صعب إنك تعمله
ليه 4 مايو ...!!!؟؟؟
يوم 4 مايو ده عيد ميلاد رئيس جمهوريتنا اللي حكمنا من شهر أكتوبر 1981 يعني أكثر من ربع قرن .. أكثر من ربع قرن في حكم مصر .. ومصر لم تتغير .. لم تتقدم خطوة للأمام ومصر كما هي إن لم تكن تتأخر في ترتيبها على جميع الأصعدة الاقتصادية والسياسية والاجتماعية مقارنةًً بباقي دول العالم الأول والثاني وكمان دول العالم العربي ...
وربع قرن ولسه المرتبات منخفضة
ربع قرن ولسه الأسعار بتزيد كل يوم
ربع قرن والبطالة في كل بيت
ربع قرن وعدم احترام آدمية المواطن المصري في طوابير العيش زي ما هية
ربع قرن وامتهان كرامة المواطن المصري في وسائل المواصلات كما هي بل بتزيد
ربع قرن والمعتقلات ممملوئة ناس أبرياء
ربع قرن والمدنيين بيتقدموا لمحاكمات عسكرية
ربع قرن والفاسدين والمفسدين لا يقدموا لأي محاكمة عادلة وإن قُدموا خرجوا من القضايا براءة
ربع قرن ولا نعرف عن الديمقراطية شيء
ربع قرن وتزوير الانتخابات مستمر على قدم وساق
ربع قرن والأمن يتحكم في كل شيء في الجامعات والمدارس والمساجد وفي كل شيء في مصر .
اليوم ده 4 مايو .. هو عيد ميلاد الرئيس .. وهو اليوم اللي كل منافق بيلبس فيه أحلى ما عنده عشان يظهر في أحلى صورة يظهر فيها أي منافق في العالم
ويكتب أقوى كلمات النفاق عشان ينول الرضا من الرئيس
وينطق بأقبح كلمات النفاق عشان ينعم عليه الرئيس بالنعم والعطايا
باختصار هو أحب يوم للمنافقين في مصر
عشان كده لازم تثبت لنفسك إنك مش منافق
عشان كده لازم تثبت لنفسك إنك بتقول كلمة الحق
عشان كده لازم تثبت لنفسك إنك إنسان .. عندك كرامة ومشاعر وأحاسيس
عشان كده لازم تثبت لنفسك إنك إنسان بتحس بالظلم اللي احنا فيه والعيشة الصعبة اللي بنعيشها ..
عشان كده لازم تشارك في الإضراب اللي هايحصل اليوم ده وتقعد في البيت وما تروحشي الشغل .. عشان تقول .. يارب أنا مش منافق ... وهذا يوم النفاق والمنافقين ... تراني يا رب العالمين أجلس في بيتي لأعلن أنني بريء تماماً من هذا النفاق وهؤلاء المنافقين ومن كل ما يفعلونه في هذا اليوم
في اليوم ده .. هانقول للريس اللي هو على رأس النظام الحاكم في مصر .. ياريس .. هذا عيد ميلادك .. نجلس فيه في بيوتنا ولم نذهب إلى أعمالنا لنعلنها لك أننا غير راضين عن أحوالنا .. نحن الشعب المصري غير راضين عن أحوالنا ... وهذا يوم ميلادك لم ننافقك كالباقين ... إننا نصارحك .. ونعلنها بملئ أفواهنا ... إن مصر ليست بخير يا سيادة الرئيس .. إن المصريين ليسوا سعداء يا سيادة الرئيس .. وقد اخترنا يوم ميلادك لنعلنها لك ... أن هناك أشياء كثيرة يجب أن تتغير يا سيادة الرئيس .. لم ننافقك .. ولم نجاملك .. ولكن نصارحك حتى لو كانت هذه الصراحة مر علقم .. وحتى لو كان هذا المر العلقم يوم ميلادك سيدي الرئيس ...!!!
أخي الحبيب ...
قلت إيه .. هاتشارك في الإضراب ومش هاتروح الشغل وهاتخليك في البيت ...
واللا هاتبقى ..... مش عاوز أقولها .. لأني واثق إنك عمرك ما هاتكون منافق ... لأن المنافقين في الدرك الأسفل من النار .. وأحنا كلنا لازم نبعد عن هذا الدرك الأسفل
على كل حال نحن في الانتظار .. ويوم 4 مايو على الأبواب .. في انتظارك ..
اوعى تنسى .. لازم تشارك .... وخليك في البيت ....
هناك تعليق واحد:
يلا حالاً حالاً حالاً حيوا أبو الفصاد , هيكون يوم 4 مايو أسود الأعياد , فليحيا أبو الفصاد .
وعقبالك يوم ميلادك لما تدوس ع اللى قرف بالك يا محسن ترررم ترررم يا محسن ترررم ترررم عقبالك يا محسن ( مين محسن ده ؟ !!!!! )
عمنا الكبير , تفتكر نحضر ايه هدية فى اليوم ده , عندى ليك شوال دقيق مسروق من المخبز بس ايه عنب هيعجبك أوى , وقال يقولك فيه رقابة على المخابز , رقابة على مين يابا دا شعب فراعنة , ولا أقولك ناخد اتنين تلاتة كيلو فاكهة مسرطنة من اياها , ولا بلاش دى ناخد ازازتين مية معدنية من المضروبة اللى مغرقة السوق , ولا أقولك ناخد ازازتين بيبسى من اللى مفيهاش صراصير , ولا أقولك أحسن هدية أيه ( الحبة الزرقاء اللى بتشفى من أهم داء ) أصلها مبقتش تفرق مع الشعب ده خلاص طالما نفخ بنفخ يبقى نتنفخ بالحبة الزرقا أفضل .
( إنني أحس على وجهي بألم كل صفعة تُوجّه إلى مظلوم في هذه الدنيا، فأينما وجد الظلم فذاك هو وطني ) -
( لن يكون لدينا ما نحيا من أجله .. إن لم نكن على استعداد أن نموت من أجله )- ( لا يهمني أين ومتى سأموت بقدر ما يهمني أن يبقى الوطن ) من أقوال تشى جيفارا
نورت مصر
إرسال تعليق